| |
|
Andecha Astur y PAS refuguen que los barcos cerqueros gallegos pesquen n'agües interiores asturianes |
Redacción, 02-02-2010
Les organizaciones polítiques Andecha Astur y Partíu Asturianista refugaron güei, al traviés d'un comunicáu conxuntu, "la posibilidá de qu'ente cincu y diez cerqueros gallegos pesquen nes agües interiores d'Asturies (les llendaes poles llinies imaxinaries que xunen los cabos del país)", sumándose asina a la postura mostrada estos díes por Rafael Rodríguez, presidente de los armadores de cercu asturianos, y Dimas García, de la Federación Asturiana de Cofradíes.
Según s'esplica nel comunicáu, "los barcos del país vecín quieren pescar nes nueses agües interiores pa garantizar la llegada a la rula de materia prima en cantidá abondo p'abastecer el mercáu, pero los armadores de cercu asturianos (nesti momentu hai cuatru n'activo) refuguen tala posibilidá, dao que los caladeros asturianos tan lloñe del so meyor momentu y afiten que'l desembarcu de más kilos de pescáu tendría comu consecuencia una baxada de los precios, yá de por sí ruinos".
P'Andecha y PAS esta midida supondría "esquilmar les agües asturianes, y non sólo impedir el desarrollu de la flota asturiana (d'alcuerdu a la demanda que se reconoz qu'esiste) sinon esaniciar lo poco que queda, al tener que competir colos gallegos y les sos técniques esquilmaores".
Poro, Andecha Astur y Partíu Asturianista exixen a la Direición Xeneral de Pesca del Principáu "que nun-yos permita faenar equí, atendiendo a les razones espuestes polos pescadores asturianos, igual que se fizo en 2008, cuandu, de la mesma manera, denegaron les llicencies a los barcos foriatos porque la flota llariega que pescaba n'agües interiores yera suficiente p'abastecer el mercáu del país".
Ambes organizaciones señalaron tamién "la responsabilidá política del Principáu nel esaniciu del seutor pesqueru asturianu", dao que "nun se trata sólo de la so incompetencia na materia, sinón del resultáu d'una planificación fecha a la escontra de los intereses d'Asturies dientro de la dinámica de sumisión a los intereses gallegos y a la política del Estáu español de desaniciu de los sectores económicos tradicionales n'Asturies y facer el nuesu país una provincia de xubilaos y camareros".
D'otra parte, Andecha Astur y Partíu Asturianista van a pidir a los Ayuntamientos d'Avilés y Colunga que se posicionen sobre'l tema y asina presionen a la Direición Xeneral de Pesca. |
| COMENTARIOS DESHABILITADOS TEMPORALMENTE
|
|
|
|
|
| |
|
|
