| |
|
Los organizadores del Intercélticu d'Avilés paguen los sos atrasos y regularicen la so situación cola SGAE |
Redacción, 02-02-2010
L'Asociación Cultural Esbardu, organizadora del Festival Intercélticu d'Avilés dende 1997, regularizó güei la so situación cola Sociedá Xeneral d'Autores y Editores (SGAE), ingresando los atrasos en conceptu de derechos d'autores devengaos pol Intercélticu ente los años 1998 y 2004.
Asina lo comunicó la SGAE nuna nota prensa na qu'espliquen que l'ingresu dispunxéralu en delles sentencies el Xulgáu Mercantil (setiembre del 2006) y, dempués, la Audiencia Provincial (setiembre del 2007).
Esbardu notificó güei l'ingresu de los atrasos, incluyendo intereses y costes, col oxetu de llevantar los embargos correspondientes; de manera especial, el practicáu sobre la propia marca del Festival Intercélticu d'Avilés. Esti llevantamientu d'embargu va facese efectivu darréu en cuanto se certifique l'ingresu.
El director de la SGAE nel Noroeste, Javier Vidal, mostróse satisfechu por esta regulación de los atrasos referentes al Intercélticu d'Avilés. Según informó la Sociedá Xeneral d'Autores y Editories, Vidal dixo que "la música de raíz necesita del nuesu respetu y cariñu". "Ye fundamental reconocer, primero, el trabayu del autor o del arreglista, figura imprescindible y valiosa nesti ámbitu, y dempués da-y el so xustu salariu pa garantizmaos la continuidá de la nuesa herencia cultural", esplicó.
La SGAE calcó na importancia del Festival Intercélticu d'Avilés, Fiesta d'Interés Turísticu Rexonal, como dinamizador cultural y celebra la so apuesta pola renovación y conservación del patrimoniu musical asturianu. |
| COMENTARIOS DESHABILITADOS TEMPORALMENTE
|
|
|
|
|
| |
|
|
