El Bloque por Asturies agradeció y felicitó güei al nuevu arzobispu d'Uviéu, Jesús Sanz Montes, por utilizar la llingua asturiana na toma de posesión el sábadu, na catedral d'Uviéu. Pa la formación, trátase d'un detalle de "respetu y reconocencia" nel so estrenu del ministeriu episcopal.

Nun comunicáu, el Bloque recuerda qu'hai un mes pidieron al arzobispu nuevu que nun siguiere los pasos del so antecesor, Carlos Osoro, na "persecución a la llingua asturiana y el despreciu a los sos falantes".

Asegura que l'esfuerzu de Sanz tien más valor al tratase d'una persona que nació fuera --ye madrilanu-- y que nun tien l'asturianu como llingua materna. Amás, considera que'l fechu del sábadu demuestra que "la intención de ser respetuosu y d'integrase na comunidá ta penriba del llugar de nacimientu de cualquier persona".

"Con esti xestu Jesús Sanz da una lleición a una parte de la clase política, económica y social que s'acomplexa a la hora de falar n'asturianu", sorraya la formación.

Dende'l Bloque esperen que'l fechu nun quede nun detalle simbólicu y piden que seya "el primer pasu d'un cambiu que lleve al idioma asturiana a la normalidá total dientro de la Ilesia católica n'Asturies".